Ons leef in die eeu van die visuele. Dit is ‘n faktor wat ons in die Kerk net so sterk in ag moet neem as in die wêreld. Naas die tradisionele Woordbediening is daar vandag ook ‘n sterk behoefte aan die sigbare belewing van God se optrede in die Bybel.

Die Christelike drama, kort of lank, gespeel of gelees, in multi- of enkelmedium, opgevoer deur oud of jonk, kan ‘n opwindende, werkbare antwoord bied.

 Ek het ‘n aantal gebeure wat in die NT evangelies opgeteken is, in kort (20-30min) dramas omskep. Mense wat direk by Jesus betrokke was, of kon gewees het, kom self aan die woord. Bekende verhale kry arms, bene, stemme en veral – harte!

 

AANWENDING

Die dramas is uiters geskik as ‘n aanvulling tot die Woordbediening. Verder kan dit gebruik word vir enige geleentheid soos ‘n kerklike- of opvoedkundige seminaar, kampe en uitreike, pouse-aanbiedings by ‘n klassis of sinode, manne- of vrouesaamtrekke, sel-aanbiedings, bybelstudies, kerkraadfunksies, skoolopvoerings, herdenkingsfeeste, kunstefeeste ens.

 

SAMESTELLING

Die dramas is in die meeste gevalle in multi-mediaformaat saamgestel. Dit kan egter ook met groot sukses in enkelmedium (sonder projeksie en musiek) opgevoer word. Verder hoef dit ook nie noodwendig gespeel te word nie, maar kan dit ook gelees word .

‘n Drama bestaan uit die volgende:

• Teks: Die teks is ‘n verhaal rondom ‘n Bybelse gebeure. In die meeste gevalle skets ‘n verteller die agtergrond en ‘n paar spelers vertolk die rolle van die karakters.
• Musiek: Op gegewe momente – soos klimakse en oorgange, kan die teks onderbreek word met kort musieksnitte met instrumente van u keuse. Die teks gee soms ‘n aanduiding van hierdie musiekmomente.
• Projeksiemateriaal: Meeste dramas verskaf inligting tov die projeksie van bybelverwysings, titels, agtergrondgeskiedenis, kaarte, name van karakters, saamsing-teks en erkennings.
• Grafiese projeksie:  Meeste dramas maak ook voorstelle vir die projeksie van grafiese materiaal.

 

ONDERSTEUNINGSPAN

Daar moet met elke opvoering mense aangewys word wat verantwoordelikheid neem vir:

• produksiebestuur en regie
• uitsoek en opstel van grafika
• dataverwerking en projeksie
• musiek en sang
• dekor en kostuums
• klank en beligting
• advertensie ens.

 

VOORDELE VAN ‘N DRAMA-OPVOERING

• ‘n Klomp mense kan geaktiveer word, nie net as spelers nie, maar ook as lede van die ondersteuningspan.
• Dit kan binne ‘n kort tyd ingeoefen word.
• Dit dek enige onderwerp – nie nét Paasfees en Kersfees nie.
• Dit is geskik vir gehore van alle ouderdomme en geslagte.
• Dit kan gespeel of voorgelees word.
• Dekor kan tot die minimum beperk word.
• Kostuums is maklik om self te maak. Dit is selde nodig om dit te huur.
• Die koste verbonde aan so ‘n opvoering is minimaal.

 

KOPIEREG

Veranderinge in die teks mag slegs met die toestemming van die skrywer aangebring word.

Illustrasies uit boeke (bv uit die Good News Bible) mag slegs geprojekteer word indien daar nie toegangsfooie gevra word nie. Kopiereg-reëls moet streng nagekom word.

Kliek ONDERWERPE vir opsommings van die onderwerpe wat aangebied word.